Padre Sisto, vignì ite,
che caite duc ve speta,
gran contenc lori ve azeta
missionario Combonian.

Dijevà bele da pico
con daite na gran voia
e na seria, bela voia
de deidà chi che patis.

Cussì, canche le braghesse
sié stat bon de ve le mete,
de polenta doi gran fete
sié stà bon de pochenà,

o, delongo sié pèe via…
A deidà, a portà legne
e a responde: vegne, vegne
e content a ubidì.

Pare e mare i ve voleva
tant de ben e i se pensava
che daite valch coava,
che n pensier avà ntel cuor.

N bel di sié mo ruà fora:
- Missionario mi devente,
che la os de Dio la sente
che l me ciama e dighe “si”. -

E sié jù e sié tornà
per vacanze tante ote…
Deidevà ju per ste mote
pare e mare a ben laurà.

Sota n bon lenzuol ve vede
pien de fen su de ste vare…
E po a sié con vost bon pare,
a fà legne e tanc de scuf.

E sto tant per fà la prova
de dut chel che nte la vita
pol servì se la i va dita
a n missionario Combonian.

Semper liegher, la salute
de segur no la ve mancia
senza paga, senza mancia
de la vita a fà del ben.

Paga si, l é chel de sora
che ogni varech l ve conta…
Ve penseo a cuant che i monta
su ntel liber del Signor?

E per dut El l ve deida:
via dalonz per chele tere
n chi di e n chele sere
co sié strach, co sié avilì.

Pare e mare lori i prea
e vost nono e vuos fradiei
che ntel fà de Dio l famei
avessà consolazion.

Voi doman, co jì via n gejia
a centà la prima messa,
che sarà na granda ressa
de la jent vignù adalarch,

recordeve vuos Coleji
che no i parde mai le strade
coche mai sto mondo vade
Col sie semper col Signor.

E noi duc ve fon auguri
de ogni ben e de salute
e che semper la ve bute
vosta santa vocazion.