Vost bel Col l é dut n festa,
Padre Florio, e dut per voi:
na fortuna come chesta
se godon e gnanca soi.

Al Missionario na gran viva
Col ve fà e l ciol ju l ciapel;
e l sonasse incia la piva
per ve fà l azet pi bel.

Propio duc se consolava
de ve vede n di a tornà
con na vita consacrada
al Signor che l v’à ciamà.

Mi volesse avè parole
le pi bele da ve dì,
ma sai cheste, puoce e sole
che dal cuor le vol fiorì.

Benvegnù mi alora dighe
nte vost pico pais
ulà che scrit le prime righe
ulà che avé fat le raisc.

No l é miga la jent sola
che ve bat de cuor le magn
incia i crep dis sua parola
lori derc e duc biei sagn.

E i ve fà na bela viva
e i ve sporz suoi pi biei fior
“Su da noi l se n vigniva
per sentì cassù l Signor.

E nost Pore e la Gujela,
Marmolada con Boè
i ve centa la pi bela
sua cianzon come a n gran re,

che la dis che pien de forza
e ben saldo voi fossà
e che sota vosta scorza
siebe duta carità.

Incia noi ve fon l augurio
che la santa vocazion
nte gejia e ntel tugurio
l’abe gran sodisfazion.

Padre Florio, la salute
ve auguron, e l bon umor;
che per voi no sie mai sute
le fontane del Signor.