Davant de jì sun gejia
volon dì doi parole,
ma propio chele sole
che ven fora dal cuor.

Per voi ncuoi le sona
dassen noste ciampane
tant ben che se fossane
da Pasca o da Nadal.

Per voi aon fat su archi
de dassa e piegn de fiori,
ncuoi somea duc siori
chilò nte nost bel Col.

Podon po ben fà festa:
l Signor n’à dat doi preve
doi nten viaz, penseve,
ci voleo de pi?

E noi al Signor tant grazie
i dijon con chesta festa;
degugn indarè no i resta,
che Col l é dut n cuor.

E preon l Signor che preve
semper l ne conzede
a tignì su la fede
che n di ne mena al ziel.

E Voi ncuoi la messa
dijé la prima ota
ilò che i v’à na ota
da picui batejà.

Chilò a set agn, divoti,
sié jui ai Sacramenti
valenc e biei inozenti
l Signor l v’à incontrà.

E forsi l v’à dit alora
“No vosto vignì preve?”
Prové mo e regordeve
e me daré rejon.

Ncuoi sié suoi ministri,
oh si, e podé dì messa
e duc ades i à pressa
de ve vede sun autà.

E Voi per i Coleji
preé po ntel “memento”
che aone sentimento
de stà con nost Signor.

Preé per i malai
per chi che à valch miseria
per chi che la vede seria
a vive nte sti di.

N’é tanc e tanc che bragia;
de cuor ve i racomande
e chi che da autre bande
no i a podù adalarch.

Cussì noi duc auna
preon de cuor alora
che Col siebe dagnora
dut cuant de nost Signor.