Dan… dlin dlin dan
dlin dlin – dan… dan…

Ma ci bel che ncuoi le sona
scoté pur noste ciampane...
no n é zerto de compagne
cusì bele e de n bel son.

Ciampanoz: i lo scomenza…
O ci bel, ci bel! Me l scote...
L ai sintù ben tante ote
ma ogni ota l é pi bel.

Co l é vea de bele feste
de sti jovegn i se sturta
e po i ciapa la pi curta
e po su sun ciampanil.

Un se tira la giacheta
che a sonà na la ie ntrighe,
con na forza che no dighe,
l à la fum nte la man.

E la granda la scomenza
a se muove con fadia,
la Mesana la pea via
bele n frego pi saurì.

E de sora l se parecia
chel che bat e no l se fala.
el l é bele sunsom sala
e l se senta n pojizion.

Nte man l à i doi batoge
e con duta sua bravura
con sua man pi che segura
l bat giust de ca e de là.

Bogna propio che l no sbalge
per produje n bel conzerto...
non n é miga tanc de zerto
che i sie bogn a sto laor.

Ven de solito chel barba
Luigi Alessio da la Pavia...
El l à l’arte e la poejia
de fà n bel gran ciampanoz.

L bel son de sue ciampane
chi da Col l sent dagnora
incia canche i gira fora
per sto mondo ben dalonz.

Che ntel cuor de duc le lassa
la sua os che semper resta
e co ven na bela festa,
duc le sent ulà che i é.