Pentecoste l i é tornade:
vé po, vé po, cuanta jent!
Da Taibon, da Listolade,
a vignì degugn s’à infent.

Incia Col ncuoi se bina,
na ota sola nte dut l an:
l fagot i à su la schina
chi che torna da bacan.

Chi che inveze apede siori
se davagna n toch de pan,
pi zivìi se sà i é lori,
con la bolga nte la man.

Ma duc ven, duc se saluda,
duc vol fà le feste a Col…
degugn conta cuant che i suda
a vignì con ciaut e mol.

E co sion duc cuanc auna
vedaré che fon dassen…
L é domà chi liei nte cuna
che a fà ore ncuoi no i ven.

Duc po centa sto “Lodato”
che l ve fora propio l cuor;
dal pi pico a sior curato
duc se n centa per l Signor.

Ben trei di la tignon fora
a dì su, craié e centà:
e ne sà pi bel dagnora
n’autra ora jì su a fà.

Noi per fà le Pentecoste
tiron fora dut l bel,
che l é feste propio noste,
le pi bele sota l ziel.