Te la dighe propio sćeta
sta mia picola punion:
t’ai vardà da l “a” a la “zeta”
co te coave vocazion.

Me pensave: Voi ben vede
ci che n ultima l farà,
mi no pos de zerto crede
che no l rue fin sa l autà,

che l Signor ne lassa core
e l ne lassa jì a zercé...
e po l dis: “Vi ca, te duore
e no stà pi a te cruzié.”

Encuoi si che ben capisse
che no m’ai mo no sbalié...
e content mi no finisse
l Signor de l ringrazié.

E de cuor mi ncuoi te augure
dut l ben che mai se sa...
e che semper la te dure
sta tua gran felizità.

Che l Signor sul cuor te sare
e l te tegne semper dur;
che te siebe n vero pare,
che te ilumine ogni scur.

Te jiras via per chi Mori…
va ti sa nte ci pais
te i mostraras a chi costori
l triol del Paradis.

E l Signor te stà po apede
a te dà semper na man,
che no t’abe mai da ziede
gnanca canche mancia l pan.

Mi de cuor per ti domande
forza tanta, tant de amor...
al Signor te racomande
che costanza t’abe n cuor.

Per intant vardon sti fiori...
per tua festa i à fiorì...
La natura, dei suoi cori,
Reciavà la l à impienì.

Padre Sisto, ten a mente
semper semper noste mont:
brich e rive, trioi e sente
che t’à dat da pico n font.

Che chilò l é n di spontada
la tua bela vocazion...
Ti te l’as ben arlevada
col laor, co l’orazion.