Co Nadal ogni an tornava
(l é ma nona che me conta
e ma nona no la jonta)
i eva duc nten da fà.

I ciauzar ferai i onjeva
apede fuoch, con sonja vegia,
e a ve l dì nte na regia
pi biei de chi de ades.

E chel bon feral da oio
i netava da no crede,
che de not i posse vede
e avè lum da jì a Maitin.

Da la una i se vistiva…
Duc auna i peava via
con sta lum, propio da nia,
con sti gran ciauzar da far.

I ava l liber dal Ufize
con la stampa da na ota…
Se i falava calche nota
degugn ava nia da dì.

L eva n liber n freo chero
co i cartogn che dut sfilava…
Dal gran gros i na zafiava
bel de pien a se l sarà.

Ma a duc tant la ie piajeva
la funzion de la Not Santa…
A chel pico l’aiva santa
i deva e l steva sol.

L dormiva lié nte cuna…
Duc i auter jiva a Messa
e darè, duc ben n pressa,
i tornava a fà cafè.

Da misdì na bona torta
de lat vert che i rencurava
da pi di e i incontentava
tant chi picui che chi granc.

L Prejepio si i lo feva
con n puoce de figure
dute cuante n sfendadure
ma tant bele da no dì.

Del pezuol no i menzonava
e degugn no l pretendeva
ma valenc istesso i steva
cuaji pi de chi de ades.

Chest, ma nona la dijeva
darè zena l’autra sera…
e l’à dit, bela sinziera,
che cussì no i sà pi bel.

Che sion cuater malujai
e contenc no sion de nia
e volon stà soravia
tant ai picui come ai granc.

Che ne toca jì al Prejepio
e al Banbin propio mpormete
che sotite a ste barete
volon mete valch de bon.