Ogni secondo momento l eva mefo da jì a se confessé. Senza confescion, deguna comunion. Nte chëla gliejia crudia, sentei jù nte chële prume cropie, mpruma de dut l eva da fè l repas col preve dei picei fac. Su diesc, che veramente volëva n eva demè trei de comándamenc: chël de no avei perié assè o de avei perié mel (e ju duta na trafila dei momenti de orazion da la domán defin da sëra!), chël del nome di Dio invano e de le burte parole (a dì «Dio» l eva bele l malan seguré; a dì «diobel» o «diocaro» e «diomisci» podëva ester na mesa salvëza, co la viertola che l’eva dut’autra parola; porco dingole, ostiocan, orca madonega i eva bele nte la lista neigra), chël dei ati impuri (na condana che no finiva mei! l comandament che plu te paráva jal infiern!). Chilò se tratáva de pensier, parole, opere e omissioni, d’avei perfin poura de giourì la boteiga de le braie a piscé e se cialé ju, che bele se fajëva picé; poura de pensé che na sorela l’ava velch de diverso sot le gonele, che guai la vedei! Poura de pronunzié una de chële parole «paze» che gnánca la mere o la nona no nomináva mei; picé mortel (percieche l eva la lista dei picei mortei e de chi veniai) a vedei per cajo doi taliagn che se bussáva a se saludé, dajache nta Fodom no se se bussáva mei.
E cánche dal vero ite per chi tiac o su per chële pasture s’assa fat le «porcherie» demè a se cialé coche s’eva fac? Condana segura!
Per cont de vic capitai ncora nviade l eva la lussuria che domináva. Ma ci che l eva la lussuria, degugn ben l savëva. N tel animel a bocia spalancada coche mostráva n cuadro del preve.
Spo, da ste cropie, ite un al viade a se confessé e l preve daite de confescional co na orogla su usciol da busc a scouté duta chëla medema tiritera de dagnëra e con chël’autra defora, che degugn no dighe mesa parola. Dementié n pico picé l eva peso che confessé un de chi grosc.
I gragn, cánche i eva – per duta na mesora davánt mëssa – i steva davossù, un per cropia: delà le ële, decà i ëi. Ite un a se confessé, duc cánc se spostáva de na cropia plu nnavánt.