Sonve su per Custijela de na bela clapada ulache, nánter chële race sot le cherpatole e soura chële mote ite, onve noste piste dei auti da se matié. Ncandenò la ciampana de capela che sona. L eva na domënia davomesdì come una de le tánte.
Ju de pichiata nánter chële zope, chi pontins, chi ourc; ju duc come cánche se auza i corf. Un se ngamberleia, l toma, l se splaia su i jenogli. Se se astala e se l dáida fora co nen può de sferiade a mán paze su per chël sánch che penghiáva ju per i jenogli.
Via ndavò come razi per no rué tert, sedenò sarevede le craugne. Chël ruo vegle te l àsse pa sentù, ti!
Ju fin prò capela, via la ciuria dal ce, iega sánta, l senn de la crousc cochemei, na douta de ce davánt auté e ite un davò l auter nte chële cropie nfladan.
E da cropia japé gliejia, séntela la sciolita ousc de Filipo Fráncia: che rembomb nte dut chël chiet!
“Bestie de muli! Che siebe l ultimo viade che no sei daite a rosare cánche se sona.
Da chël berba s’ava trica, l eva dagnëra ndessené…