Cari nuiz, mi ve salude
e ve augure dut l ben.
Prega Dio che mai l se stude
sto bel fuoch de amor saren.

La pi gran bona fortuna
mi ve augure sota l sol,
e che semper bel auna
ve n jisà per vost triol.

Che l Signor ve benedisse,
l ve tegne la sua man
e a duc doi l ve spartisse
grazie ncuoi e incia doman.

Che stessà nte voste cese
biei contenc nte Posauz,
che la strada no ve pese
de chi mostri de chi Vauz.

E ve augure incia la cuna
che la nine ben dassen…
che incia ilò avessà fortuna
e tosac da volè ben.

Ntel laor, avé misura,
tant col sié che a restelà,
che l istà assai l dura
per ruà a ora a se stracà.

Tant de ben semper voleve,
de chel bon che ven dal cuor
e chi vege rencureve
con passienza e con amor.

Se fe gnoch o fuiadine,
o cafè o valch de pi bon,
duc auna scompartive
ogni bon o trist bocon.

E deideve a tirà auna
la careta, a jì inavant
e con semper bona luna,
che vost jof no sie debant.

E na viva si ve faje,
darè dut chel che v’ai dit.
No podeve miga taje
co duc cuanc i feva l pit.

Viva i nuiz! Su duc auna,
su scraion con dut l cuor.
La pi gran bona fortuna
con le grazie del Signor.