Co s’à fat na sfachinada
se se senta volentiera:
na paussada, no élo vera?
La comeda propio i os.
Incia l ajen, co l é ora,
i lo lassa paussà fora.

Padre Armando, tiré l fie…
che l é ora, ora granda
e dorjeve su n na banda
senza cruzi né sudor.
E lassé che i liber reste
su n sofita nte valch zeste.

Incia chi che cor a crepe
co i é n zima ilò i se senta;
tant co l piof che canche l venta
i se n paussa ben saurì.
E sue giambe e braz se gode…
auter pi che a jì con rode.

E voi incia sié ruà n zima
e l’avé po propio arjonta
chela bela, auta ponta
con fadie che l Signor sà.
E la zima Voi godeve:
Missionario e incia preve.

Jì mo fora per ste zime,
per sti bosch, a l’aria bona
e scoté che ncora i sona
de le vace i ciampaniei…
E i guziei encora i centa
co l é l sol e canche l venta.

E jì su per Scufoline
a cuié de bele stele
e bel svelto fé rodele
come co sievà n tosat…
Oh, ci bel, ci bel se gode
colassù, sota le crode!

Co saré ben paussà fora,
e n bon mantes d’aria bona,
co sta jent calche bambona
ben de cuor v’avarà sport,
e l fagot de zerto alora
no l ve fà no pi paora!

Ma cioleve na valigia
longia, largia e bona granda
e mpinila da ogni banda
con dut chel che pol jì ben,
che dut cuant via ilò ve oga
sia gujela, sia la oga.

Co avaré na bona sciuoda
dintor via de biei moreti,
che vol pan, che vol spagheti
e ciamija da i vestì,
zerciaré nte vost bagalgio
con fiduzia, con coragio.

E po canche la gujela
stenta a fà le cujidure
e le bree le sarà dure
da pianà, Voi dijaré:
“Chilò mancia ben ma mare
e chilò volesse l pare.”

Ma vidui i avé dagnora
ntel laor come che i feva…
Na gran scola chela l’eva
che v’à propio tant joà
e faré con gran passienza
chel che dis vosta sperienza.

Padre Armando, ades finisse,
sta gran longia ciacolada
che sta jent sarà stufada,
che na barba Voi n avé.
Ma po l rest, sota na palma,
se diron con nosta calma.

Dut l bon mi ve l augure:
tanta jent sturteve auna,
sota l sol, sota la luna,
sturté file a no finì,
che con Voi ele se segne,
che con Voi n Ziel le vegne.