Don Vizenzo, ades po vegne
incia mi a ve saludà;
nò, no n’é rejon che tegne:
incia mi voi valch da fà.

L é po n pez che spetevane,
don Vizenzo, sto bel di
e ve vede volevane
sun autà a benedì.

E se ncuoi sion duc n gloria,
se da ride valch dijon,
e incia on n freo de boria,
meriton po ben perdon.

Co jivà con vosta mare
n gunela n prozession,
canche sechevà vost pare
per tirà con el l sion,

co jivà bel sodo a scola
col ciapel tant massa grant,
e bastava na parola
per ve fà stà come n sant,

n eva puoz che la cherdeva
che dei Monech sto tosat,
semper serio che l tajeva,
ma l pensava da n om fat,

n bel di l vignisse preve
per seguì sua vocazion,
e passasse su per Treve
per voi, Col n prozession.

E po canche de le fede
fevà l paster lavia Pien
me par cuaji de ve vede
con gran voia de fà ben.

“Per tirà no l à le fede
l Signor de zerto fat”
ve l à dit po vosta meda,
ma co l mal ja l eva fat.

Puora bestia, senza coda
la é restada n chel burt di
e, sformada a chela moda,
no la ve piajeva pi.

E nlaota a vosta mare
desperos avé pensà,
e, bragiant, avé la mare
con gran crai chel di ciamà.

N chel viaz l avé proada
ci che dura n bon pastor,
ma l’istesso n chela strada
jù darè sié a nost Signor.

E mi ades de cuor ve augure
che la vade semper ben
e che le abe voste cure
pi fortuna che via Pien.

O, ma ades po si che lasse,
che ve ai bele tant stufà,
na parola ncora i passe
a i vuos duc che m’à scotà:

Barba Isepo, meda Lita,
che tant fat avé e laurà,
per i dà doi sort de vita
e al Signor l consacrà,

L Signor ve benedisse,
l ve paghe n tera e n ziel;
e dagnora l custodisse
don Vizenzo, suo fradel.